തുരുമ്പ്

തുരുമ്പ് 

എ.  വി.  ശശിധരൻ സംവിധാനം ചെയ്യുന്ന 'ഒളിപ്പോര് ' സിനിമയുടെ ഷൂട്ടിംഗ് നാട്ടിൽ നടക്കുന്നു .  യുവസുഹൃത്ത് വിപിന്റെ വിവാഹപാർട്ടിയിൽ വെച്ച്  നടനും നാടകാചാര്യനുമായ ചേർത്തല ജയസുര്യ പറഞ്ഞ്  ഇന്നലെ വൈകീട്ടാണ് അറിഞ്ഞത് .  ഫഹദ്  ഫാസിലും  തലൈവാസലും കലാഭവൻ മണിയും സറീന  വഹാബുമൊക്കെയുള്ള  സംഭവം തുടങ്ങീട്ടു രണ്ട് ദിവസമായത്രെ. സുഹൃത്തിന് ചെറിയൊരു വേഷവും ഉണ്ട് . നേരിട്ട് ലൊക്കേഷനിലേക്ക് പോകാൻ  തയ്യാറായിട്ടാണ്  അദ്ദേഹം വന്നിരിക്കുന്നത് . സ്വന്തം നാട്ടിൽ വരുന്ന ഫഹദിനെ  കാണാൻ മനസ്സ് ആവേശം കൊണ്ടു . 'ചാപ്പാക്കുരിശി'ലും  'ഡയമണ്ട്  നെക്ലേസി'ലും തുടങ്ങിയ പരിചയമാണ് . വെള്ളേപ്പവും റൂമാലിയും ചിക്കനും കുറുമയും വെട്ടിവിഴുങ്ങുന്ന പെരുത്ത ആർത്തിയോട്  സുല്ല് പറഞ്ഞ് ഉടനെ ജയസൂര്യക്കൊപ്പം ലൊക്കേഷനിൽ പോയി. ലോക്കേഷൻ  പുറനാട്ടുകര   കോൾപ്പാടത്തിന്റെ കരയിലുള്ള മൂർപാറ . നാട്ടിൻപുറത്തു നടക്കുന്ന ഒരു 'നാടകംകളി'യും അലമ്പുകളുമാണ്  വിഷയം.  നാടകക്കാരും , കാണികളും കമ്മിറ്റിക്കാരും ഒക്കെയായി ൃശ്ശൂരിലെ ഒട്ടേറെ പ്രമുഖ നാടക പ്രവർത്തകർ എത്തിയിട്ടുണ്ട് . ശശിധരൻ നടുവിൽ,  സി. ആർ. രാജൻ , പ്രതാപൻ , ഗിരീഷ്‌ അങ്ങിനെ നിരവധി പേർ. കൂട്ടത്തിൽ ബാബു അന്നൂരും.

ദേഹാസകലം ഇളക്കി തന്റെ രസകരമായ സിനിമാനുഭവങ്ങൾ  പ്രതാപൻ അഭിനയിച്ചു കാണിക്കുന്നതും കണ്ടുകൊണ്ട്‌ ചിരിച്ചുലഞ്ഞങ്ങിനെ നിൽക്കുമ്പോഴാണ് സുമുഖനായ ആ ചെറുപ്പക്കാരൻ പുഞ്ചിരിച്ചുകൊണ്ട് എനിക്കരികിൽ വന്നത് . നല്ല പരിചയം. പക്ഷെ എപ്പോൾ എവിടെയാണ് എന്നാണ് എന്നൊന്നും പിടി കിട്ടുന്നില്ല. ആൾ സിനിമാപ്രവത്തകനാണ് എന്നൊക്കെ ഉറപ്പിച്ച് ആജന്മപരിചയം നടിച്ചു നില്ക്കുമ്പോൾ ചെറുപ്പക്കാരൻ ചോദിച്ചു :

"ബാലേട്ടന് വേഷണ്ടോ ഇതില്?"

"അയ്യോ ഇല്ലില്ല്യ. ഷൂട്ടിംഗ് കാണാൻ വന്നതാ ." പിന്നെ ആവേശത്തിൽ  കൂട്ടിച്ചേർത്തു "എന്റെ വീട് ഇബടട്ത്താ. "

അപ്പോൾ എടുത്തടിച്ച പോലെ  ചെറുപ്പക്കാരൻ പറഞ്ഞു:

"അയ്‌ !. ഇയ്ക്കറിഞ്ഞൂടെ ബാലേട്ടാ ! ഞാൻ ഇബടെള്ളതന്ന്യല്ലേ . ബാലേട്ടന്റെ പിന്നിലാ താമസിക്കണേ .പ്രവീണും കൂട്ടുകാരും കൂടി മ്മളൊക്കെ ആൽത്തറേലിര്ന്ന് സംസാരിക്കാറില്ല്യെ?"

".......... !!"

എന്തൊക്കെയോ ഞഞ്ഞപിഞ്ഞ പറഞ്ഞു ചമ്മലൊഴിവാക്കി നിൽക്കുമ്പോൾ തിരിച്ചറിഞ്ഞു....

മനസ്സിനും വയസ്സാവുന്നു !

പുഞ്ചവയൽക്കരയിലെ  രാത്രിയുടെ മേടപ്പുഴുക്കത്തിലേക്ക്   റസൂലിന്റെ നിഷ്ക്കപടമായ പുഞ്ചിരിയുമായി ഫഹദ് ഫാസിൽ വന്നിറങ്ങിയപ്പോൾ പെട്ടെന്നുയർന്നലയടിച്ച കയ്യടികളിലും വിസിലടികളിലും പൂഴ്ത്തി മനസ്സിനെ                   ശാന്തമാക്കി....  

XXXXXXXXX