മുട്ടിറക്കൽ

 

മുട്ടിറക്കൽ 

ഇന്നലെ അർജൻ്റിന ഈജിപ്റ്റ് മത്സരം ആദ്യപകുതി കഴിഞ്ഞപ്പോൾ ഉറങ്ങാൻ കിടന്നു. ഉറക്കമിളയ്ക്കുന്നത് അധികം നല്ലതല്ലെന്ന് വൈദ്യോപദേശമുണ്ട്. ഒരു ഗോളിന് പിന്നിട്ടു നിന്ന് മെസ്സിയും കൂട്ടു കാരും മൈതാനത്തിലും ലയണൽ സ്കലോണിയും സിൽബന്ധികളും ഡഗൗട്ടിലും ഓടി വിയർക്കുന്നതു കണ്ടെങ്കിലും 'ഈ ഗോള് നോക്കണ്ട അർജൻ്റിന തന്നെ ജയിക്കും' എന്ന ഉത്തമ ബോദ്ധ്യത്തിൽ കിടക്കയിൽ മലർന്നു. അത്താഴം കഴിഞ്ഞുള്ള പതിവ് മൂന്ന് കി.മീ നടത്തത്തിൻ്റെ ക്ഷീണമുള്ളതിനാൽ വേഗം ഉറങ്ങി.

പ്രോസ്റ്റേറ്റ് ഗ്ലാൻ്റ് വികസനപാതയിൽ രാത്രി നാലു തവണ മൂത്രമൊഴിക്കൽ പതിവുള്ളതിൽ ആദ്യത്തെ ഷെഡ്യൂൾ സമയം പതിനൊന്ന് മണിക്ക് തന്നെ ഉണർന്നപ്പോൾ സ്വീകരണമുറിയിൽ ആരവം. മരുമകൻ കളി കാണുന്നുണ്ട്. ഒരു ഔത്സുക്യത്തിൽ മൊബൈൽ തുറന്നു നോക്കിയപ്പോൾ അർജൻ്റീന 0 ഈജിപ്റ്റ് 2...!

ഹെൻ്റെമ്മേ!

സംഗതി ബ്രസീൽ ഫാനാണെങ്കിലും അർജൻ്റീനയുടെ വിരോധിയല്ല. കിടക്കപ്പൊറുതിയില്ലാതെ വന്നപ്പോൾ വന്നപ്പോൾ ടീവിക്കു മുന്നിൽ ചെന്നു.

"ഈജിപ്റ്റ് ഒന്നു കൂടി അടിച്ചു!"

മരുമകൻ പറഞ്ഞു.

സമയം നോക്കി. ഇനി പതിനാലു മിനിറ്റ് മാത്രം. അർജൂസ് നൈലന്മാരെ ഇക്ഷ ഇഗ്ഗ ജിച്ച ജഞ്ഞ വരയ്പ്പിക്കുന്നുണ്ട്. അടുത്തിരുന്ന വെള്ളക്കുപ്പിയിൽ നിന്ന് ഒരു കവിൾ മോന്തിയ സമയമാണ് അതുണ്ടായത്....

റൊമേറോ.....

പിന്നാലെ മെസ്സി, ഫെർണാണ്ടസ്.... അങ്ങിനെ വഴിക്ക് വഴി പ്ടും പ്ടും മൂന്നെണ്ണം! പത്ത് മിനിറ്റിനുള്ളിൽ രണ്ട് ഈക്വലൈസർ ഒരു വിന്നർ! ദൈവമേ, അർജൻ്റീനയ്ക്ക് മാത്രമേ ഇതു കഴിയൂ!

ലോങ്ങ് വിസിൽ...

ടീവി നോക്കി ഒന്നു തൊഴുതെണീക്കു മ്പോഴുണ്ട് മെസ്സി എന്നെ തിരിച്ചു തൊഴുതുകൊണ്ട് പറയുന്നു:

"മാഷേ... വളരെ നന്ദി. ആ കാൽവരി യാണ് ഞങ്ങളെ ജയിപ്പിച്ചത്. ഈ നട്ടപ്പാതിരയ്ക്ക് രോഗം അവഗണിച്ച് വന്നിരുന്ന് മുട്ടറുത്തു തന്നില്ലേ! ഒരു മണിക്കൂറു കൊണ്ട് ഞങ്ങൾക്ക് സാധിക്കാതെ പോയതാണ് പത്ത് മിനിറ്റിൽ അങ്ങു കഴിച്ചു തന്നത് ! വാമോസ് വാമോസ്!"

ഞാനോർത്തു.

2007 ലെ ആദ്യ ടി20 ക്രിക്കറ്റ് ലോക കപ്പ് ഇന്ത്യക്ക് നേടി തന്നത് കളി കണ്ടിരുന്നി ടത്തു നിന്ന് ഭാര്യ എഴുന്നേറ്റ് അടുക്കള യിൽ പോയ സമയം നോക്കി വീണ മേത്തരം മൂന്നു പാക്ക് വിക്കറ്റുകളാണ്! അവസാന വിക്കറ്റ് അവശേഷിക്കേ ശബ്ദം കേട്ട് ടീവിക്ക് മുന്നിലേക്ക് ഓടി വന്ന അമ്മയെ മകൾ ബലമായി പിടിച്ച് അടുക്കയിലിട്ട് പൂട്ടിയതും ഡീപ് ഫൈൻ ലെഗിൽ ശ്രീശാന്തിൻ്റെ കയ്യിലതാ മിസ്ബാ ഉൾ ഹഖ്, കപ്പ് ഇന്ത്യയ്ക്ക്!

ഒരാൾ ടീവിക്കു മുന്നിൽ വന്നിരുന്നു ഒരാൾ എണീറ്റ് പോയി എന്ന വ്യത്യാസ മേയുള്ളു, രണ്ടിലും ജയപരാജയങ്ങൾ നിർണ്ണയിച്ച മുട്ടറുപ്പുകളാണവ!.

പോരാൻ നേരം ടീവിയിലേക്ക് ഒന്നു കൂടി നോക്കിയപ്പോൾ ഈജിപ്പിൻ്റെ മൊട്ടത്തലയൻ കോച്ചും കളിക്കാരും എന്നെ വിരൽ ചൂണ്ടി അലറുന്നു

"ഈജിപ്റ്റിന് പിണ്ഡം വെക്കാൻ വന്ന ഹറാമീ, നിനക്ക് ഞങ്ങൾ വെച്ചിട്ടുണ്ട്!"

സമയവും സൗകര്യവും ഒത്താൽ അടുത്ത വർഷം ഈജിപ്റ്റ് യാത്രയും പിരമിഡ് ദർശനവും പ്ലാൻ ചെയ്തതാ യിരുന്നു. അപ്പോൾ അത് ഖുദാ ഗവാ!

വെട്ടിക്കിറി നൈൽ നദിയിൽ ഒഴുക്കും അല്ലെങ്കിൽ പൊതിഞ്ഞു കെട്ടി മമ്മിയാക്കി പിരമിഡിലിട്ട് കരിങ്കല്ല് കെട്ടും ഈജിപ്റ്റുകാർ!

See less