ബൂമറാങ്ങ്

 

ബൂമറാങ്ങ്

ഇന്നലെ പൾസ് പോളിയോ വാക്‌സി നേഷൻ എടുക്കാൻ പേരക്കുട്ടി പുറപ്പെടുമ്പോൾ നാല്പതു വർഷം മുമ്പ് നാട്ടിൽ വായനശാലയുടെ സഹകരണ ത്തോടെ നടന്ന ഒരു ട്രിപ്പിൾ ആൻ്റിജൻ വാക്സിനേഷൻ ക്യാമ്പിൻ്റെ ഓർമ്മ മനസ്സിൽ ഓടിയെത്തി. വായനശാല പ്രസിഡണ്ടും ആത്മ സുഹൃത്തുമായ അശോകനും സെക്രട്ടറി തിരുമേനിയും ഞാനും ചേർന്ന് ആശ്രമം പ്രൈമറി സ്കൂൾ ഹെഡ് മാസ്റ്റർ ശ്രീധരൻ മാഷെ കാണാൻ പോയി. സ്കൂളിൽ ഒന്നാം ക്ലാസിൽ പഠിക്കുന്ന കുട്ടികളുടെ വീട്ടുകാരെ അറിയിക്കണം അതിന് മാഷുടെ സഹായം വേണം. കാര്യമറി ഞ്ഞപ്പോൾ സസന്തോഷം മാഷ് സമ്മതിച്ചു. പിരിയും നേരം സംശയ നിവൃത്തിക്കായി ശ്രീധരൻ മാഷ് ചോദിച്ചു

"അല്ല അശോകാ കുത്തിവെപ്പിൻ്റെ പേരെന്താന്നാ പറഞ്ഞേ ആൻ്റി ട്രിപ്ളിജൻ അല്ലേ?"

ഉള്ളിൽ തികട്ടിവന്ന ചിരിയൊതുക്കി അശോകൻ പറഞ്ഞു:

"അല്ല മാഷേ, ട്രിപ്പിൾ ആൻ്റിജൻ."

സ്കൂൾ ഗേറ്റിനു പുറത്തു കടക്കാൻ കാത്തു നിൽക്കുകയായിരുന്നു ഞങ്ങൾ രണ്ടു പേരും ഒന്നു മുക്ത കണ്‌ഠം ചിരിക്കാൻ. അതു കണ്ട് ഒട്ടും ഇഷ്ടപ്പെടാതെ തിരുമേനി മസില് പിടിച്ച് ചോരച്ചു നിന്നു.

ഈ കാര്യം വായനശാലയിലും ആൽത്തറയിലുമുള്ള സുഹൃത്തു ക്കളോട് കാണുമ്പോഴൊക്കെ പറഞ്ഞു ചിരിച്ചു അശോകൻ..

ക്യാമ്പ് ദിവസം വന്നുചേർന്നു. ഉൽഘാടന സമ്മേളനത്തിൽ ബ്ലോക്ക് ഡെവലപ്മെൻ്റ് ഓഫീസറായിരുന്നു മുഖ്യാതിഥി. തിരുമേനിയുടെ സ്വാഗത പ്രസംഗം കഴിഞ്ഞ ഉടൻ അശോകൻ തൻ്റെ അദ്ധ്യക്ഷപ്രസംഗം തുടങ്ങി.

"പ്രിയപ്പെട്ടവരെ, ഞാൻ അധികം സംസാരിക്കുന്നില്ല. ഇന്നിവിടെ നടക്കാൻ പോകുന്ന..."

വാക്‌സിനേഷൻ്റെ പേര് മറന്നു പോയിട്ടാവണം ഒന്നു ശങ്കിച്ചു നിന്ന ശേഷം പെട്ടെന്ന് പിടി കിട്ടിയ പോലെ അശോകൻ തുടർന്നു:

"..ആൻ്റി ട്രിപ്ലിജൻ ക്യാമ്പിൻ്റെ..."

ശ്രീധരൻ മാഷുടെ നാക്കുപിഴക്കഥ അശോകനിൽ നിന്നു കേട്ടവരും സദസ്സിലുണ്ടായിരുന്നു.

കൂട്ടച്ചിരിയൊതുങ്ങി ബ്ലോക്ക് ഓഫീസർ ഉദ്ഘാടനപ്രസംഗത്തിന് എണീറ്റപ്പോൾ തിരുമേനി ചെരിഞ്ഞ് അശോകൻ്റെ ചെവിയിൽ മന്ത്രിച്ചു

"അശോകൻ ബൂമറാങ്ങ് എന്ന് കേട്ടിട്ടുണ്ടോ?"

"കേട്ടിട്ടേണ്ടാർന്നുള്ളൂ തിരുമേനീ, ദേ ഇപ്പൊ കണ്ടു... അല്ല കൊണ്ടു!"

സദസ്സിനൊപ്പം ചിലവഴിക്കാതെ റിസർവിൽ വെച്ചിരുന്ന ചിരി പുറ ത്തെടുത്തപ്പോൾ പൊട്ടിച്ചിരിയായിമാറിയത് തിരുമേനി അറിഞ്ഞില്ല. പ്രസംഗം തുടങ്ങിയിരുന്ന ബ്ലോക്ക് ഓഫീസർ നിരസത്തോടെ അവരെ നോക്കി. തിരുമേനിയും അശോകനും ചുവന്നു.

See less