ലോനപ്പേട്ടന്റെ പീയെന്‍ബി
അരിയങ്ങാടിയിലെ പലചരക്ക് മൊത്തവ്യാപാരക്കടയിലെ അസിസ്റ്റന്‍റ് ലോനപ്പേട്ടന്‍ അടച്ച പണം എണ്ണിക്കൊണ്ടിരിക്കുമ്പോള്‍ കൌണ്ടറിനപ്പുറം അണ്ണാമല യൂണിവേഴ്സിറ്റിയിലേക്ക് ഡ്രാഫ്‌റ്റിന് പണമടക്കാന്‍ വന്നു ക്യൂവില്‍ നില്‍ക്കുന്ന രണ്ടു വിദ്യാര്‍ഥികള്‍ നേരം കൊല്ലാന്‍ ക്വിസ് കളിക്കുന്നത് കേട്ടു.
എസ്‌. ബീ. ഐ. എന്ന് പറഞ്ഞാല്‍ ഫുള്‍ ഫോം എന്താടാ ?
സ്റ്റേറ്റ് ബാങ്ക് ഓഫ് ഇന്ത്യ
സീ. ബീ. ഐയോ?
സെന്‍ട്രല്‍ ബ്യുറോ ഓഫ് ഇന്‍വെസ്ടിഗേഷന്‍ .
തെറ്റി. കടം ഒന്ന്.! സെന്‍ട്രല്‍ ബാങ്ക് ഓഫ് ഇന്ത്യ .
പള്ളീല് പറഞ്ഞാ മതി!. അത് ഇവര് ബാങ്കുകാര്‍ക്ക്.
ഓക്കേ, സമ്മതിച്ചു. എസ്‌. എം. ജീ. ബീ ന്ന്ച്ചാലോ?
സൌത്ത് മലബാര്‍ ഗ്രാമീണ്‍ ബാങ്ക് .
ഗുഡ് !. അപ്പൊ ഐ സീ ഐ സീ ഐ ബാങ്കോ?
വേറെ ആളെ നോക്ക് ട്ടാ ഗഡീ! . ഇന്റസ്ട്രിയല്‍ ക്രെഡിറ്റ്‌ ആന്‍ഡ്‌ ഇന്‍വെസ്റ്റ്‌മെന്റ് കോര്‍പറേഷന്‍ ഓഫ് ഇന്ത്യ ബാങ്ക്.
എന്റമ്മേ! നീയ് പുല്യാണലോ ഗഡീ...ഇതൊക്കെങ്ങനെ സാധിച്ചു ?
വായിക്കണം. പേപ്പറും പുസ്തകോം വല്ലപ്പഴും വായിക്കണം !.
ശരി. ഇനി അവസാന ചോദ്യം. ആലോചിച്ചിട്ട്‌ വേണം ഉത്തരം പറയാന്‍.
നീയ് ചോദ്യം ചോദിക്ക് ബ്രോ!
സ്റ്റേറ്റ് ബാങ്ക് കഴിഞ്ഞാല്‍ ഇന്ത്യയില്‍ ഏറ്റവും അധികം ബ്രാഞ്ച്കളുള്ള ബാങ്കാണ് പീ. എന്‍ .ബീ . ആ പീയെന്‍ബി ഒന്നു നീട്ടിപ്പിടിച്ചേ !.
പിള്ളേരുടെ സമയംകൊല്ലിക്കളി സാകൂതം ശ്രദ്ധിച്ചുകൊണ്ടിരുന്ന ലോനപ്പേട്ടന്‍ ആവേശപൂര്‍വം ചാടിക്കയറി പറഞ്ഞു.
" ഞാന്‍ പറയാം. പഴേ നെടുങ്ങാടി ബാങ്ക് !."
".......!?!"
പണമടച്ച രസീതിയും വാങ്ങി തങ്ങളെ നോക്കി മുറുക്കാന്‍കറ പിടിച്ച പല്ലുകള്‍ കാട്ടി ചിരിച്ചുകൊണ്ടു നടന്നു നീങ്ങിയ ലോനപ്പേട്ടനെ പിള്ളേര് അന്തം വിട്ടു നോക്കി നിന്നു...!
**********----------------------------------------------------------------------------------------------------------------------------------
പൊതുവിജ്ഞാനത്തില്‍ ലോനപ്പേട്ടന്റെ റേഞ്ച് ഇല്ലാത്തവര്‍ക്ക്‌ ഇതാ ഒരു 'കുളു ' :-
മലയാളത്തിലെ ആദ്യത്തെ നോവല്‍ 'കുന്ദലത ' എഴുതിയ അപ്പു നെടുങ്ങാടി 1899 ല്‍ കോഴിക്കോട്ട് സ്ഥാപിച്ച ദക്ഷിണേന്ത്യയിലെ ആദ്യത്തെ സ്വകാര്യ കമേഴ്സ്യല്‍ ബാങ്കായ നെടുങ്ങാടി ബാങ്ക് 2003 ല്‍ പീ. എന്‍ .ബീ (പഞ്ചാബ് നാഷണല്‍ ബാങ്ക് ) ഏറ്റെടുത്തു!!
പൊതുവിജ്ഞാനത്തില്‍ ലോനപ്പേട്ടന്റെ റേഞ്ച് ഇല്ലാത്തവര്‍ക്ക്‌ ഇതാ ഒരു 'കുളു ' :-
മലയാളത്തിലെ ആദ്യത്തെ നോവല്‍ 'കുന്ദലത ' എഴുതിയ അപ്പു നെടുങ്ങാടി 1899 ല്‍ കോഴിക്കോട്ട് സ്ഥാപിച്ച ദക്ഷിണേന്ത്യയിലെ ആദ്യത്തെ സ്വകാര്യ കമേഴ്സ്യല്‍ ബാങ്കായ നെടുങ്ങാടി ബാങ്ക് 2003 ല്‍ പീ. എന്‍ .ബീ (പഞ്ചാബ് നാഷണല്‍ ബാങ്ക് ) ഏറ്റെടുത്തു!!
