പെണ്ണാളും പെരുന്നാളും
പതിവില്ലാതെ സന്ധ്യക്ക്‌ ആല്‍ത്തറയിലേക്ക് ഒന്നിറങ്ങിയതാണ് . അവിടെ രണ്ടു പേര്‍ മാത്രമുണ്ട് . സൂരജും വിഷ്ണുവും.
" ഇന്ന് ഇറ്റ്ഫോക്കിനു ( International Theatre Festival of Kerala) പോയില്ലേ ബാലേട്ടാ? " സൂരജ് ചോദിച്ചു.
" ഇല്ല്യ നല്ല സുഖം തോന്നീല്ല്യ."
പിന്നെ നാടകോത്സവസംവിധാനങ്ങളെക്കുറിച്ചുള്ള ചര്‍ച്ചയായി . ഡെലിഗേറ്റ് പാസ്സ് , ബ്ലാക്ക്‌ ബോക്സ്‌, ഇന്റിമേറ്റ് തിയ്യറ്റര്‍ , ഇന്ത്യന്‍ ടെമ്പസ്റ്റ്, ഗോപാലന്‍ എന്നിങ്ങനെ വിചാര്‍ മഞ്ച് കറങ്ങി കറങ്ങി അന്നയും റസൂലിലുമെത്തി . നല്ല ചിത്രം. ഫഹദും ആന്ദ്രിയാസ് ജെര്‍മിയയും സൂപ്പര്‍. ജീവിതത്തിന്റെ യഥാതഥമായ ആവിഷ്കാരം. നല്ല റിസര്‍ച്ച്. പള്ളി പെരുന്നാളിന്റെ ചിത്രീകരണത്തിലെ സ്വാഭാവികത. പെണ്ണാളെ പെണ്ണാളെ എന്ന ബാന്റ് സെറ്റ് പാട്ടിന്റെ തെരഞ്ഞെടുപ്പിലെ ഔചിത്യം. പട്ടുകുട. അമ്പ് . വെള്ളമടി. അടി.
" ആ അടി പക്ഷെ വളരെ സീരിയസ് ആയി. പണ്ടൊക്കെ പെരുന്നാള്‍ തല്ലിന് ഇത്ര ഈണം ഇണ്ടാര്‍ന്നില്ല്യ . അപ്പച്ചന്റെ തമാശ മാത്രായിരുന്നു ".
അറുപതിനോടടുക്കുന്ന ഞാന്‍ ഗൃഹാതുരനായി.
" ഏയ്‌ ! ഇപ്പൊക്കെ സീരിയസ്സാ ബാലേട്ടാ . "
പുതുയുവത്വത്തിന്റെ പ്രതിനിധിയായ സൂരജ് ചൂണ്ടിക്കാട്ടി.
വാസ്തവം . പക്ഷെ അന്നത്തെ പെരുന്നാളടിക്ക് വ്യത്യാസമുണ്ടായിരുന്നു. മിക്കവാറും സഹോദരപുത്രന്മാര്‍ തമ്മിലായിരിക്കും കലാപരിപാടി. എല്ലാ വര്‍ഷവും 'പെണ്ണാള് ' തന്നെയായിരിക്കും മൂലകാരണം. ' നിത്യവിശുദ്ധയാം കന്യാമറിയമേ ' കഴിഞ്ഞാല്‍ ഉടന്‍ ബാന്റ് സെറ്റുകാരോട് ലോനപ്പന്‍ ആജ്ഞാപിക്കും:
"ഡാ ഇനി പെണ്ണാളെ പെണ്ണാളെ അലക്ക് "
അപ്പൊള്‍ അന്തോണി വിരട്ടും:
" അത് പള്ളീല് ; നീയ് കായലരികത്തടിക്കടാ " .
തര്‍ക്കം അന്തമില്ലാതെ നീളുമ്പോള്‍ ബാന്റ് സെറ്റുകാര്‍ താര്‍ക്കികന്മാരുടെ ശാരീരികം ഒറ്റ നോട്ടത്തില്‍ വിലയിരുത്തി 'ഇതൊക്കെ മ്മള് എത്ര കണ്ടിരിക്കണ് ' എന്ന പുച്ഛത്തില്‍ 'പെണ്ണാളെ' പാടിത്തുടങ്ങുന്നു. അടി പൊട്ടുന്നു. പക്ഷെ വെറും ഉന്തും തള്ളും ദേഹത്ത് കൊള്ളാത്ത അടിയും മാത്രം. കവിഭാഷ കടമെടുത്താല്‍ സ്നേഹത്തിന്റെ ഒരു കലങ്ങി മറിച്ചില്. രക്തബന്ധത്തില്‍ പെടാത്ത മറ്റു വല്ലവരും പ്രശ്നത്തില്‍ ഗുരുതരമായി ഇടപെട്ടാല്‍ സഹോദരന്മാര്‍ ഒന്നിക്കുന്നു. ഇടപെടലുകാര്‍ തത്സമയം പിന്‍വാങ്ങുന്നു.
വെള്ളമടിയും അലമ്പുകളുമില്ലാതെ അച്ചടക്കത്തോടെ രാത്രി പത്തു മണിക്ക് മുന്‍പ് അമ്പെഴുന്നെള്ളിപ്പ് പള്ളിയിലെത്തിക്കാന്‍ ഇടവകക്കാര്‍ ശ്രദ്ധിക്കുന്നതുകൊണ്ട് മക്ഡൊവലിനും , മാന്‍ഷന്‍ ഹൗസിനും , ഹണീ ബീക്കും ഇപ്പോള്‍ ബ്രേക്ക്‌ ഡാന്‍സ്‌ കളിക്കാന്‍ പെരുന്നാളില്‍ ഇടമില്ലാതായി......
00000000
